ភ្នំពេញ : សកម្មភាពផ្នែកប្រតិបត្តិការពាក់ព័ន្ធនឹងវិស័យអាកាសចរណ៍ស៊ីវិលនៅក្នុងតំបន់បិទខ្ទប់ ត្រូវបានអនុញ្ញាតឱ្យដំណើរការជាធម្មតា ប៉ុន្តែស្ថាប័នសាធារណៈពាក់ព័ន្ធនឹងវិស័យអាកាសចរណ៍ស៊ីវិល និងប្រតិបត្តិករអាកាសយានដ្ឋាន ត្រូវកាត់បន្ថយមន្ត្រី និងបុគ្គលិកបម្រើការងាររបស់ខ្លួនឱ្យមកនៅត្រឹមកម្រិតអប្បបរមា ដោយផ្អែកតាមតម្រូវការចាំបាច់និងដោយអនុវត្តគោលការណ៍អាហារថ្ងៃត្រង់នៅហ្នឹងកន្លែងបំពេញការងារ។ នេះបើយោងតាមប្រការ ៧នៃសេចក្តីសម្រេចរបស់រាជរដ្ឋាភិបាលកម្ពុជា ស្តីពីការបន្តការបិទខ្ទប់ភូមិសាស្ត្ររាជធានីភ្នំពេញ ននិងក្រុងតាខ្មៅនៃខេត្តកណ្តាល ដើម្បីទប់ស្កាត់ការឆ្លងរាលដាលនៃជំងឺកូវដី-១៩ ចុះថ្ងៃទី២៦ ខែមេសា ឆ្នាំ២០២១។ 

ចំពោះការធ្វើដំណើរពាក់ព័ន្ធនឹងវិស័យអាកាសចរណ៍ស៊ីវិលនេះ ត្រូវបានអនុញ្ញាតចំពោះការធ្វើដំណើររបស់អ្នកដំណើរតាមផ្លូវអាកាសទៅអាកាសយានដ្ឋាន ដោយត្រូវភ្ជាប់មកជាមួយនូវ ឯកសារបញ្ជាក់អត្តសញ្ញាណ និងឯកសារពាក់ព័ន្ធនឹងការធ្វើដំណើរ។ ចំពោះការធ្វើដំណើររបស់ អ្នកដំណើរតាមផ្លូវអាកាសចេញពីអាកាសយានដ្ឋាន ត្រូវអនុវត្តតាមវិធានផ្នែកសុខាភិបាលជាធរមាន។

ការធ្វើដំណើររបស់មន្រ្តី និងបុគ្គលិកផ្នែកប្រតិបត្តិការដែលបម្រើការងារនៅអាកាសយានដ្ឋាន ត្រូវភ្ជាប់មកជាមួយនូវឯកសារបញ្ជាក់អត្តសញ្ញាណ និងលិខិតបញ្ជាបេសកកម្ម ឬលិខិតអនុញ្ញាតធ្វើដំណើររបស់គណៈកម្មការប្រតិបត្តិនៃ គ.ប.ខ.។

ចំពោះការធ្វើដំណើររបស់មន្ត្រី និងបុគ្គលិកដែលបំពេញការងារបម្រើឱ្យការហោះហើរតាមផ្លូវអាកាស ក៏ត្រូវបានអនុញ្ញាតនៅក្នុងតំបន់បិទខ្ទប់ ដោយត្រូវភ្ជាប់មកជាមួយនូវឯកសារបញ្ជាក់អត្តសញ្ញាណ និងលិខិតបញ្ហាបេសកកម្ម ឬលិខិតអនុញ្ញាតធ្វើដំណើររបស់គណៈកម្មការប្រតិបត្តិនៃ គ.ប.ខ.៕